Cerpen Novline Lidia Rewah: "......dapa inga dulu....!"

.......dapa inga dulu waktu masih di kampung,
bakumpul rame-rame....
deng torang pe tamang-tamang.....
dudu di parampatan jalang di kampung......
deng modal.....juk ato gitar......
somo manyanyi.....kong bacarita......
mulai dar da ser tu nona di jaga satu ato jaga barapa stou.....
sampe deng......tu keke oom utu poto mar panjaha pe anak nama wulan.....yang poto rupa depe papa mar bakendis kwa e........
kal tole walak so ja ba petik depe gitar deng dua snar paling bawah.......deng lagu makatana......samua baku iko manyanyi.....biar ada suara lari sei....ada suara blek......mar samua iko manyanyi nya pake orang bapalu.......

masih nyong-nyong katuun kang......
jadi tu carita masih sampe di batas.......tu nona-nona di kampung sandiri......
so ja ser-ser mar tako mo tanya.......kage katu tu nona tolak manta-manta nya dua kwa kata tu malo.........
ada lai tu so lama da ser-ser nona dikampung......mar nya ja dapa kasampatan bacarita lantarang.....salalu tu nona kal kaluar....depe kaka ja iko balakang........
ada lai kasiang so suka mo ba slamat malang pa nona ......mar tako skali dar depe opa kuntua ta tua2 dikampung yg di hormati samua orang.......

tu carita cinta dikampung kebanyakan.......rupa kandas cuma sampe di suka pa tu nona.....apalagi kasiang dulu-dulu kang.....adat istiadat bangsa minahasa......kuat skali.......jadi ya kal blung ada kuda ato sapi ato kobong deng tu alat2 rumah tangga.....nya barani mo pi maso minta.......
jadi orang tua kasiang ja bilang......kerja bae2....rajing2 kasana supaya boleh mo pi maso minta tu nona yg ngana suka........

kal da orang mati.......
so ni dia tu kesempatan nyong-nyong deng nona-nona ja baku dapa......
lantarang lama ni acara......bisa sampe pagi deng depe acara ......wora-wora cincing....rata-rata samua nyong-nyong deng nona-nona......boleh baku haga......biar katu cuma sampe disitu kang....deri jang torang lupa.......samua orang tua so pasang pa pala ato kuntua......lia-lia akang ta pe anak.......!
mar yang nya bisa tong lupa di acara wora-wora cincing.......ja ba pantun......kong ja baku-baku balas.........rupa bagini noh.....
nasi dinging satu balanga
mari kugantung di pohong kopi
sudah ingin berumah tangga
bar satu calana golpi.

kong tu laeng balas lai....
tiga kapal barete-rete
kapal ditengah muat karanjang
tiga nona barete-rete
nona ditengah mata karanjang.....
.....nya rasa tu rasa cinta so bartumbuh dar da baku balas pantun.......

dapa inga dulu......
pi batifar saguer dikobong......
kal da nona2 lewat mo pi bobaso di kuala......rupa pepatah bilang......dar mana datangnya cinta,dar mata turung ka hati kata......biar dar atas pohong da batifar........so kacili tu nyong ba floit.....ato bersiul.....no napa tu nona-nona yg deng loto da isi pakeang kotor lai.......mulai ator gaya.....sambil bobaso pakeang di kuala ato pancuran.......bacarita tentang tu nyong yg dia da takser......
bagimana tu nyong pe mata.....badang......depe tatawa,suara....dan sampe depe kumis model bagimana dong carita sambil bobaso......

dapa inga dulu.....
pi mapalus pa orang kampung pe kobong......
no mo bapacol se kalar dalang satu hari tu kobong......
nya herang tu nona-nona deng nyong-nyong pe tampa bakudapa juga katuun tu mapalus.......

era globalisasi.......so nda dapa kasiang tu babagini......biar baron supermarket.....mini market....dan baron dunia.......tong nda dapa tu babagini di tampa laeng......

membaca,merenungi nasib bangsa minahasa yang hampir punah ditelan kebobrokan ahlak dan martabat pemimpin bangsa minahasa yang egois.....serakah dan gila kedudukan......gila hormat.......dong nya sadar kasiang.........SO KURANG UNTUNG NAMA TU KATA MINAHASA.........sedang depe arti MINAHASA........dong solupa dan sengaja dilupakan....ya dilupakan.....lantarang yg dong pikirkan........bagimana kal jadi pejabat supaya boleh kuras abis rakyat pe doi.......biar maso panjara.....dorang so nya tako........pokoknya bisa bli samua tu tanah di kampung pinawetengan deng baruci lai pake nama orang laeng.......!!!!!!!!......

..hoi para pemimpin bangsa minahasa.......tong pe tanah minahasa da seberbage for bangsa minahasa turun temurun.......bukang untuk dimiliki oleh seorang pejabat.......!!!!!!!!!!!

dapa inga dulu.......
kuntua deng pala.......da kobong sandiri yg dong ja pacol deng mapalus satu kampung......
rakyat biasa......da kobong sandiri yg dong ja pacol deng mamapalus satu kampung......
ta pe bangsa minahasa......nda pernah tagantong pa bangsa laeng.......
mar skarang.......so laeng skali.......banya skali bangsa minahasa.....bajongko pa bangsa laeng......

dapa inga dulu......
inga kasana bukang mo bale kemasa lalu......mar masa lalu yg gemilang sebagai bangsa minahasa....seharusnya sekarang harus menjadi masa keemasan bagi bangsa minahasa.

dapa inga dulu......




kampung sorong,16 desember 2009.