Cerpen Karya Yudy Lumenta: "Ini Qta pe Kisah"

Qta pe nama Wenie.R,tamang2 ja pangge Cuma Wen. Ni nama pe arti,Wellem deng Nietje pe gabungan. Wellem.R itu Qta pe papa sdangkan Nietje.S itu Qta pe mama. Orang2 slalu ja hormat ato ja paksa tersenyum kalu bakudapa deng papa. Mar yang lebe dorang hormat tantu Qta pe opa,Ventje.R. Bagimana dorang nda mo hormat,dia kan Gubernur propinsi M. Jadi Qta ini cucu gubernur. Bukang Qta pe mau mo jadi bagini,soalnya yang Qta tau dulu nyanda bagini.

Sampe Qta SMA, Opa cuma dosen,deng ja aktif di partai politik. Torang le pe kluarga depe hidop biasa2. Papa ja badola, mama tre Cuma bajalang kaki kalu mo pi kerja, maklum depe kantor Cuma dekat dari rumah. Hidop mulai brubah waktu opa tapilih jadi anggota DPR.

Qta masi inga bagimana papa pe sibuk jadi opa pe tim sukses. Kasana kamari cari pendukung. Sayang Qta pe umur blum cukup for bapili. Kalu so cukup, paling Qta le jadi opa pe tim sukses di Qta pe skolah. Sapa nyanda suka anggota keluarga mo jadi anggota DPR, baru mo lia depe gaji so beking malele gidi2. Akhirnya kerja tim sukses nda sia2, opa tumbus DPR. Torang kluarga bauni sama2 di TV, pas depe pelantikan. Soalnya Cuma oma tu bole pigi gedung DPR.

Baru dua minggu jadi anggota, Qta pe opa so ja kase spleter pa Qta. Dia bilang ada dapa doi operasional ketua fraksi, jadi berbage dulu deng cucu2. Qta tantu sanang deng kondisi2 bagini. Sekitar tiga bulan kemudian, opa so jadi ketua DPR. Kiapa bagitu? soalnya ketua yang dulu , meninggal dunia akibat serangan jantung. Opa yang notabene ketua fraksi yang juga cukup vokal kalu pas sidang2 langsung tapilih for mo ganti. Tentu ini prestasi yang depe imbas, gaji le iko nae, cucu2 tatawa cina. Qta skarang lebe bangga pa Opa, depe usaha dari dulu akhirnya babuah.

Torang le pe hidop mulai tabae. Papa langsung ba kredit oto, nanti opa bayar kata depe bulanan. Qta le yang dulu Cuma bole lia2 tu baju Spyderbilt ato Billabong, skarang so bole rasa bagimana tu kaos. Pokoknya hidop ini so berubah. Hidop lebe berubah waktu pemilihan gubernur. Opa sebagai Ketua DPR,punya pengaruh besar for bapilih gubernur. Pokoknya brapa kali Qta lia pa opa pe rumah ja datang orang2 top yang mo ba calon gub. Eh ternyata, opa le mo ba calon.

Dan yang Qta nda pernah sangka en duga, opa jadi gubernur. Ternyata keakraban selama 4 bulan di gedung yang sama beking ni anggota2 DPR lebe suka pilih dorang pe ketua deng wakil sandiri for jadi gubernur deng wagub. Padahal kalu mo pikir, opa nyanda banya babuang. Nya sama deng tu calon2 laeng, yang ja servis bagus2 pa anggota2 DPR.

Mar itu no yang namanya hidop. Orang nda pernah tau apa yang di Atas pe mau. Torang cukup jalani deng slalu bersyukur deng apa yang ada. Torang kluarga iko sanang pas opa tapili jadi gubernur. Otomatis torang pe nama kluarga langsung ta angka. Bayangkan,lima taong ke depan opa jadi orang no 1 di propinsi. Brarti torang pe kluarga le turut jadi kluarga no 1.

Yang nda ena setelah opa jadi gub, Qta so nda bebas bergaul. Biar bagimana Qta musti jaga nama bae kluarga. Jadi so nda mungkin Qta mo nongkrong di leput, manyanyi deng bagate kasegaran. Skarang Qta so di level Jack Daniels. Mar memang itu yang Qta rasa. Opa jadi gubernur, cucu le jadi public figure. Tiap Qta ka skolah, tu mata2 slalu ja perhatikan pa Qta. Depe lucu tu guru2 skarang so brubah pa Qta. Kalu biasa matematika 6, skarang so jadi 8.

***

Nya sulit for Qta mo cari maitua. Soalnya setelah lima bulan jadi gub,opa batanya pa Qta sebagai cucu paling tua,

”apa ngana pe mau, Wen??”

yang ada pa Qta pe otak saat itu Cuma oto. So lama Qta ja menghayal, bawa oto sandiri ka skolah. Dan akhirnya, satu unit Daihatsu Feroza jadi Qta pe milik. Deng ini oto, Qta banya carita. Soalnya banya tu parampuang2 matre badekat pa Qta. Biar le Qta nda bawa oto,yang namanya cucu gub, cewe2 tetap suka badekat,apalagi so ada oto sandiri. Mulai dari gaga sampe yang biasa2 sok dekat deng Qta.

Yang aneh, kiapa baru skarang ngoni suka bergaul deng Qta? Waktu Qta masi orang biasa, ngoni ja bajao soalnya lengkali Qta maso klas so bobou minuman. Memang dulu Qta akrab deng tamang2 yang orang pe istilah jap2. Maklum orang kampung, jadi pengaruh di skolah. Supaya dorang nda mo jajah, mau tak mau Qta musti akrab deng dorang. Akhirnya Qta jadi sering mabo. Mar yang Qta sanang, ni tamang2 ini, dorang itu setia kawan. Tiap kali Qta ada masalah, salalu dorang bantu. Perna satu kali, Qta lari dari rumah lantaran ada baku strekel deng sebe. Tamang2 ini yang kase nasehat,nda guna mo lari,lebe bae pulang kong bacirita bae2.

Qta bersyukur punya tamang2 bagini. Biar nakal2, mar dorang itu sebenarnya bae. Jadi pas Qta so jadi cucu gub, dorang nda perlu mo cari muka mo badekat pa Qta, soalnya torang itu so akrab. Dari Qta yang nda ada apa2 sampe skarang. Kalu dulu torang ja minum captikus, skali2 kalu ada doi, kasegaran. Skarang Qta ja traktir pa dorang minum dry gin, ato kalo ada doi banya Qta bli akang Jack Daniels. Yang Qta tatawa kalu ja lia dorang minum. Lantaran lida cap tikus, jadi ni minuman2 mahal maso tre2, padahal depe kadar alkohol tinggi. Akhirnya dorang pun mabo berat.

Sampe Qta lulus SMA, dorang tetap jadi Qta pe tamang bae. Kenangan2 pas ba cao sama2,basambunyi dari guru slalu akan tasimpang dalam memori. Qta sebenarnya opa ada suru kase lanjut studi di luar. Mo kulia di ibukota ato luar negri,dia sanggup mo biaya. Qta pikir2 , Qta masi suka tinggal disini. Masi mo nikmati posisi sbagai cucu gub.

Jadi Qta kuliah disini. Sama deng kondisi SMA, di kampus pun banya skali yang ja ba cari muka. Dorang pura2 bae di muka pa Qta lantaran Qta pe status. Coba kalu Qta Cuma mahasiswa biaasa?mar bagitu no ini realita. Qta pun harus jalani. Bagus tre banya orang ba bae2 pa Qta. Depe sadap, Qta gampang mo cari cewe. Tinggal mo pili komang.

Mar Cuma satu yang beking Qta jatuh hati.Depe nama Gina. Ni cewe aktif di BKK, jadi dia itu anak rohani. Qta pikir nda mungkin dia mo manfaatkan Qta pe status. Laeng carita deng cewe laen yang rata2 matre. Jadi Qta langsung tertarik pa Gina.

Dan cinta pun tak bertepuk sebelah tangan. Qta deng dia akhirnya jadi. Setelah jadi,nda ada yang namanya bajalang ka 21 ato tampa2 laeng. Qta slalu dia pangge maso praise centre ato iko kkr.

Kondisi bagini terasa sulit for Qta. Dimana deng doi yang Qta punya mudah skali tagoda for mo ba foya2 di pub ato café. Apalagi Qta pe kebutuhan ato dorang bilang kecanduan akan alkohol termasuk tinggi. Qta nimbole kalu satu hari kong nda minum.

Begitupun dengan urusan musik,di oto Gina slalu pasang kaset GMB.Sydney ato Frangki Sihombing. Padahal Qta ini penggemar Marylin Manson yang nyata2 menghujat Tete Manis. Kalu Qta mo langsung pindah aliran,itu susah. Akhirnya lengkali Qta deng dia ja bakuambe lantaran Qta so bobou minuman. Qta perna bapikir,lebe bae jadi deng cewe yang Qta bole ator,supaya Qta bebas. Mar Qta pe hati so terlanjur sayang pa Gina. Dan mungkin kalu torang ta trus kaweng kong dapa anak.tu kacili pe nama mungkin Wegi,gabungan Wenie dan Gina. Mar itu masi jao,Qta masi suka nikmati ini masa muda. Dia pun masi suka kase klar tu kulia kong lebe serius di pelayanan. Qta deng dia tetap trus batona. Dan Qta pun trus minum for penuhi Qta pe kebutuhan alkohol.

* * *

Keadaan jadi mulai rumit pas somo pemilu. Nintau kyapa papa le mo iko bacalon jadi anggota DPR. yang lebe soe,oma le iko2 bacalon. Qta pikir kalu papa masi wajar mar oma? itu so nda maso akal. Biar le torang pe kluarga lagi dia atas mar jang talalu vulgar kwa. Cukup jo tu opa ja ambe dari proyek2 yang diantaranya fiktif. Blum cukup le tu gaji gubernur amper ampa taong ini ? Nintau sapa tu ada kase2 panas spaya oma ba calon. Mar Qta kasiang Cuma cucu jadi nimbole beking apa2. Yang Qta nimau kwa orang2 somo bilang torang ini kluarga rakus!! memang itu no depe imbas pas rakyat tau papa deng oma bacalon. Dorang langsung bapikir lantaran opa pegang posisi jadi depe bini deng anak gampang dapa doi for kampanye. Sebenarnya kalu torang ini nda beking hal2 sama deng ini,mungkin rakyat mo hormat trus. Soalnya slama ampa taong ini, propinsi ada aman tentram. Beda deng daerah2 laeng yang banya konflik. Opa berhasil kase erat tu hubungan antar umat beragama. Di sisi ekonomi,banya investor yang datang karna dorang lia ini daerah aman. So itu Qta nda abis pikir kiapa papa deng oma mo beking rusak ni opa pe prestasi. Qta pastiu kalu opa pe perjuangan jadi sia2 karna rakyat nilai depe kluarga yang golojo. Mar mo beking apa le,pemilu so berlalu., Papa deng oma mulus tapilih. skarang rakyat so ilang simpati pa opa. Kiapa opa cuma kase biar ini samua..?

Yah,kalu so bagini ,pasti opa so nyanda mo tapilih ulang di periode brikut. Jadi Qta bilang pa opa,manfaatkan bae2 jo ini satu taong trakhir.

Qta langsung tagi tu opa pe janji mo kase kulia di luar negri. Qta so pastiu tinggal disini,so nda tahan orang ja bilang keluarga golojo...