SASTRA MINAHASA: Puisi-puisi Kalvein "Kale" Wuisan. MINAHASAN TETENGKOREN I-III

Tabea Waya e Karapi!

Sastra for Minahasa Masa Depan!

Mengapa sastra (baca: tulisan)?

Sebab tulisan adalah bentuk kasat mata dari bahasa yang adalah alat atau perwujudan budaya yang digunakan manusia untuk saling berkomunikasa atau berhubungan, baik lewat tulisan, lisan, ataupun gerakan (bahasa isyarat), dengan tujuan menyampaikan maksud hati atau kemauan kepada lawan bicaranya atau orang lain. Melalui bahasa, manusia dapat menyesuaikan diri dengan adat istiadat, tingkah laku, tata krama masyarakat, dan sekaligus mudah membaurkan dirinya dengan segala bentuk masyarakat.

Kemudian: Mengapa pake Bahasa Manado? No kong kyapa dang?

Karena tak ada lagi bahasa lain yang menjadi 'lingua franca" di se-enteru Minahasa hari ini selain bahasa yang dulunya torang kenal juga sebagai "Melayu Manado".

Yang terutama adalah bahwa lewat sastra kita dapat kembali menjabarkan “Kebudayaan Minahasa” hari ini. Dengan menulis kita dapat kembali meluruskan benang kusut sejarah Bangsa Minahasa. Lalu, lewat tulisan, kita menggapai keabadian, io toh?

Puisi-puisi Kalvein "Kale" Wuisan. MINAHASAN TETENGKOREN I-III

Sekarang bukan ley zaman
Torang mo tutu mata
Tutu mulu rapat-rapat
Duduk badiang
Babahaga
Mati kutu
Sekarang bukan ley zaman
Torang maruku pa dorang pe kaki
kong jilat-jilat cepatu
mengemis keadilan
Sekarang bukan ley zaman
tong rupa sapi cucu idong
ta iko-iko
apa yang dong bilang
Sekarang badiri sama tinggi
pigi kase bobale
dorang di atas kursi
biar dong tau
arti REVOLUSI
I YAYAT U SANTI

Orang bilang tong kaya
Hasil kobong deng tambang
Tabuang buang
Mar…..
lia sekarang
Beras so nae gila gila
Kurang kopra lebe murah
Mar salah-salah mo makan kopra to’
Torang manusia bukan anjing
Napa lei…..
Harga 1 kilo gula so = 1kilo besi tua
Kurang paser lebe murah
Mar ndak mungkin to
Kopi par deng paser
Biarley dia kopi torabika
Tetap depe par gula
Apaley….
Co” cek di pasar
Bawang rica tomat pe harga
Lawang lawang harga baju
Torang orang minahasa
Makanan musti pedis
Mar…..
Mokase pedis bagimana
Kalo rica deng depe tamang
So harga 1 par baju?
Torang orang pang bagaya
Lebe beli baju
Dari beli barito
Torang so musti sadar
Minyak tanah musti murah
Inga kasiank kalo ujang
Kayu api basah samua
Ndak mungkin to momasa
Bakar pintu7 rumah??/
Inga kasiank tu orang
Yang ndak ja pake
Kayu api
Mo momasa pake apa dorang?
Kalo sto kwa
Itu konfor bole isi aer kincing
Biar minyak tanah mahal
Ndak pengaruh
Mar kasiank
Tong pe kincing ndak ja manyala
Ini kwa lantaran dorang
Talalu bijak mo ator tong pe hasil bumi
So itu………………..
Mar jo tong angka pulungku
Pigi di kantor rakyat
rame rame jang sandiri sandiri
tong tuntut tong pe hak
kalo dong ba lamu
suruh turung dorang samua
biar pemilu ulang

III

Musim cingkeh
Depe wer ndak baku maso
Cingkeh so merah rupa rica blum pete
Lantaran ujang sapu trus
Petani cingkeh bilang
“lebe bae bongkolu di pohong
Daripada busuk di muka mata’
Mar katu
Dorang tettap bersyukur
Riqi tiap hari minggu
5kg/kk sumbang di gereja
Sampe-sampe pendeta
Yang ndak ada pohong cingkeh
1karong dong pe cingkeh
Dikamar belakang
Jemaat ada kase
Memang dimuka dong bersyukur
Mar dihati momake
Lantaran tong pamarenta
Dari zaman ATO sampe SBY
Ndak ja taru qira
tu barang ni dia
“lebe bae gusdur
Cingkeh riqi 90ribu”
Dong bilang ba gitu
mar mo bekeng bagimana
somo kaluar taripang
patani cingkeh babataria
Mar pamarenta so
Ndak ja parduli
Piii……….
Bagitu kata tu wakil rakyat
Cuma Duduk Diam Dapa Doi
Tong disini babataria
Dong disana pake headset nokia n93
So rupa tre kwa
Toko hp tu pinggang
Rigi 2biji hape tagantong di ban
Bagimana katu
Torang pe hak
Dorang korupsi
Caparuni…………
Makanya sekarang
Jang tako-tako
Angka lilang tinggi-tingi
Kong suruh dong turung
Mar jaga
Jang sampe anarkhi
Inga torang orang beriman