Tabea Waya e Karapi!

Sastra for Minahasa Masa Depan!

Mengapa sastra (baca: tulisan)?

Sebab tulisan adalah bentuk kasat mata dari bahasa yang adalah alat atau perwujudan budaya yang digunakan manusia untuk saling berkomunikasa atau berhubungan, baik lewat tulisan, lisan, ataupun gerakan (bahasa isyarat), dengan tujuan menyampaikan maksud hati atau kemauan kepada lawan bicaranya atau orang lain. Melalui bahasa, manusia dapat menyesuaikan diri dengan adat istiadat, tingkah laku, tata krama masyarakat, dan sekaligus mudah membaurkan dirinya dengan segala bentuk masyarakat.


Kemudian: Mengapa pake Bahasa Manado? No kong kyapa dang?

Karena tak ada lagi bahasa lain yang menjadi 'lingua franca" di se-enteru Minahasa hari ini selain bahasa yang dulunya torang kenal juga sebagai "Melayu Manado".

Yang terutama adalah bahwa lewat sastra kita dapat kembali menjabarkan “Kebudayaan Minahasa” hari ini. Dengan menulis kita dapat kembali meluruskan benang kusut sejarah Bangsa Minahasa. Lalu, lewat tulisan, kita menggapai keabadian, io toh?



Tulisan Paling Baru

ini tong pe posting terbaru.

Puisi-Puisi Jenry Koraag: "Minahasan Spirit, Malesung Tetap Fasung, Minahasan Nigthmare, ..."

MINAHASAN SPIRIT



kudaruju deng samua

kalo nda stuju torang momaju

kudapuki deng samua

kalo nda akui torang pe I.Q

kudacuki memang dorang

bapikir cuma deng doi

sampe so nintau diri

riki ilang jati diri.

tagal itu kita tulis puisi

for mo pui padorang

sampe deng tai tai

Jenry Koraag

(Februari 2007)

MALESUNG TETAP FASUNG



nda ada yang tagantong

kalo torang nyanda potong..

sapa yang mo malawang

kalo torang malawang

torang musti beking siang malang

Minaesa tetap tahang

sampe dorang mati deng bantahang

karna torang slalu usung,

malesung tetap fasung


Jenry Koraag

(Februari 2007)





MINAHASAN NIGHTMARE



Dong bilang Puyun ni’ Lumimuut pande – pande

ba skola tinggi – tinggi sampe so nintau diri

tu Stien riki so bicara deng tiga bahasa dunia,

di televisi deng radio pake lhu – gue supaya gaul

riki amper munta ubi

Dong bilang Puyun ni’ Lumimuut jago – jago

bergaul jo – jao sampe so lao sala

tu Ato manyanyi tarabe – rabe

limbiskit deng sex pistol jadi idola

Makaruyen kata pangge – pangge ujang

Dong bilang Puyun ni’ Lumimuut gaga – gaga

kuli ubu kupas sama deng miss univers

tu Pinkan badan ba bodi linca ba goyang,

diskotik deng pub jadi depe tampa tiap malang

kalu Maengket kwa so dulu – dulu

Dong bilang Puyun ni’ Lumimuut mantap – mantap

gergantang tabuka ceke apa yang ada

tu Hans ba smokol dunkin pake Kentucky,

biar ma’ repot pizza hut jaga gengsi

cucur deng bobengka kata beking saki puru

Jenry Koraag

April 2005



ALEGORI MAKATANA


Qta nyanda mo lupa

depe nama Minahasa

satu tampa rupa sorga

Empung da kase sebagai karunia

Qta nyanda mo lupa

depe nama Minahasa

tanah grui alam kaya

sampe – sampe banya yang jaja

Qta nyanda mo lupa

depe nama Minahasa

pulang kampong di gunung

abis ujang kong cuaca mendung

Qta nyanda mo lupa

depe nama Minahasa

kopi panas smokol ubi rubus

sambil dengar lagu koes plus

Qta nyanda mo lupa

depe nama Minahasa

om Dolop deng roda sapi

pulang kobong bawa kayu api

Qta nyanda mo lupa

depe nama Minahasa

tiap sore kumpul di bois

lia – lia wewene manis

Qta nyanda mo lupa

depe nama Minahasa

rame – rame baku tulung

mar nda ada yang mo cari untung

Jenry Koraag

April 2005

Minggu, 30 September 2007 | Diposting oleh Kontributor Tetap Blog Ini di 05.26  

Label:

0 komentar:

Posting Komentar

Langganan: Posting Komentar (Atom)