SASTRA MINAHASA: Puisi Denni Pinontoan: "So depe waktu ba bale".

Tabea Waya e Karapi!

Sastra for Minahasa Masa Depan!

Mengapa sastra (baca: tulisan)?

Sebab tulisan adalah bentuk kasat mata dari bahasa yang adalah alat atau perwujudan budaya yang digunakan manusia untuk saling berkomunikasa atau berhubungan, baik lewat tulisan, lisan, ataupun gerakan (bahasa isyarat), dengan tujuan menyampaikan maksud hati atau kemauan kepada lawan bicaranya atau orang lain. Melalui bahasa, manusia dapat menyesuaikan diri dengan adat istiadat, tingkah laku, tata krama masyarakat, dan sekaligus mudah membaurkan dirinya dengan segala bentuk masyarakat.

Kemudian: Mengapa pake Bahasa Manado? No kong kyapa dang?

Karena tak ada lagi bahasa lain yang menjadi 'lingua franca" di se-enteru Minahasa hari ini selain bahasa yang dulunya torang kenal juga sebagai "Melayu Manado".

Yang terutama adalah bahwa lewat sastra kita dapat kembali menjabarkan “Kebudayaan Minahasa” hari ini. Dengan menulis kita dapat kembali meluruskan benang kusut sejarah Bangsa Minahasa. Lalu, lewat tulisan, kita menggapai keabadian, io toh?

Puisi Denni Pinontoan: "So depe waktu ba bale".

Hari ini tamang, so nda sama deng tempo doeloe
Samua so laeng, banyak yang so berubah
So ilang tu suara burung taong di blakang rumah
Burung manguni lei so ba jao,nda tahu da lari ka mana
So nyanda ja dapa dengar tu suara tambor mapalus
Torang lei so jarang ja pegang pacol kacuali peda

Itu samua kurang torang ja dengar dari carita
dari pa torang pe opa-opa deng oma-oma
baca di buku-buku orang-orang Blanda da tulis
depe carita lei banyak yang so nda lengkap
Maar untung masih ada carita yang ta sisa

Qta pe opa bilang, Tou Minahasa dulu kata brani
Qta pe oma carita, Minahasa dulu kata nda ja kase beda orang
Tatulis di buku, Minahasa dulu kata depe tanah subur deng kaya
Dorang bilang, Minahasa dulu kata banyak orang pande
Maar, ada lei yang bilang, Minahasa kata dulu alifuru

So bagitu kasiang,
qta pe Minahasa
ngana pe Minahasa
torang samua pe Minahasa
banyak yang kurang carita

Kalo so bagini, apa torang mo beking???
Mo bale ulang di zaman tempo doeloe itu,
Kong torang samua bale pake cidako?

Nyanda stou kang!
Skarang so zaman komputer deng internet
Zaman torang kurang ja bakudapa di facebook
Zaman banyak orang so pake jeans ketat deng longgar
Zaman cuma tindis nomor so boleh bacirita deng tamang di jao
Zaman torang pigi di jao boleh sampe deng cuma nae burung besi
Zaman torang baku dapa dengan orang laeng yang dari mana-mana
Zaman samua kurang ja baku rekeng doi deng baku rebe kadera

Maar tamang bukang brarti Minahasa so ilang!
Torang lei masih Tou Minahasa yang hidop di sini
Asal torang masih tau, tu Minahasa itu masih ada
Kong jang malu-malu bilang kalu torang Tou Minahasa
Torang kase hidop ulang tu semangat ba Minahasa
Torang musti jadi Tou Minahasa ulang:
brani,
pande,
kuat,
pambae,

So itu, skarang depe waktu torang ba bale pa torang pe tanah
Pa torang pe wanua-wanua, tu torang pe pusa da tanang akang
Beking tu paling bagus yang torang boleh beking
Sampe datang tu hidop yang torang da harapkan:
“Pakatuan wo pakalewiren cita imbaya!!”

Bukit Inspirasi, 10 Januari 2010